ನನ್ನ ನಿನ್ನ ನಡುವಿರುವುದು
ಒಂದು ದೊಡ್ಡ ಆನೆ-
ಯಾಗಿದ್ದರೆ ಏನು ಮಾಡುವುದು?
ಮುಟ್ಟುವುದು ಬೇಡ -
ನಾನು-ನೀನು ತಲೆಗೊಂದು ಮಾತಾಡಿ
ಆನೆಯ ಇರುವಿಕೆಯೇ ಹಾಳಾದೀತು...
ಹಾಗೇ ಇರಲಿ ಬಿಡು
ನನ್ನ ನಿನ್ನ ನಡುವಿರುವುದೊಂದು
ದೊಡ್ಡ ಬಣ್ಣದ ಗುಳ್ಳೆ-
ಯಾಗಿದ್ದರೆ ಏನು ಮಾಡುವುದು?
ಮುಟ್ಟುವುದು ಬೇಡ-
ಮುಟ್ಟಿದರೆ ಗುಳ್ಳೆ ಒಡೆದು
ಕಣ್ಣೊಳಗಣ ಬಣ್ಣ ಅಳಿಸಿಹೋದೀತು...
ಹಾಗೇ ಇರಲಿ ಬಿಡು
ನನ್ನ ನಿನ್ನ ನಡುವಿರುವುದು
ದೊಡ್ಡದೊಂದು ಸೊನ್ನೆ-
ಯಾಗಿದ್ದರೆ ಏನು ಮಾಡುವುದು?
ಮುಟ್ಟುವುದು ಬೇಡ ಬಿಡು -
ಸೊನ್ನೆಯೊಳಗಿನ ಸೆಳೆತಕ್ಕೆ
ನಾನೂ ನೀನೂ ಸೊನ್ನೆಯಾದೇವು...
ಹಾಗೇ ಇರಲಿ ಬಿಡು.
No comments:
Post a Comment