ನೀರಿನಂತೆ, ಗಾಳಿಯಂತೆ, ಬಾನಿನಂತೆ...

ನಾನೂ ಬದುಕುತ್ತೇನೆ, 

ನೀನೂ ಬದುಕುತ್ತೀಯ
ಯಾಕಂದರೆ, ಹುಟ್ಟಿಸಿದವ 

ಹುಲ್ಲುಮೇಯಿಸುವುದಿಲ್ಲ

ಆದರೆ,
ಹೇಗೋ ಬದುಕಿಬಿಡುವುದಲ್ಲ

ಬದುಕಬೇಕು -
ನೆನ್ನೆಯ ಕರಿನೆರಳು 

ಇಂದು ಕತ್ತಲ ತಾರದಂತೆ
ಮಳೆ ಬಂದಾಗ ನೆನೆಯದ ನೆನಪು
ನಾಳೆ ಕನಸಾಗಿ ಕಾಡದಂತೆ...
ಅರಳಿದ ಹೂಗಳ ಮೆಟ್ಟಿ
ಗೋರಿ ಕಟ್ಟಿ ಮೆರೆದಾಡದಂತೆ...

ಇಂದು ಕೈಗೆಟಕಿದ ಸೂರ್ಯ
ನಾಳೆ ನಮ್ಮೊಳಗ ಸುಡದಂತೆ...
ಬದುಕಬೇಕು -

ನೀರಿನಂತೆ, ಗಾಳಿಯಂತೆ, 

ಬಾನಿನಂತೆ...

ಇಂದಿನ ದೀಪ ನಮ್ಮ

ನಾಳೆಗಳ ಬೆಳಗುವಂತೆ...

ಹೆಜ್ಜೆಯುಕ್ಕಿಸಿ ನಡೆವ ನೆಲ

ನಮ್ಮ ತೂಕಕ್ಕೆ ನಲುಗದಂತೆ
ನೆರಳುಕ್ಕಿಸಿ ಹೋದ ಹಾದಿಯಲ್ಲಿ 

ತಂಪಾಗಿ ಕುಳಿತವರು ನೆನೆಯುವಂತೆ